تسميات اغلاق التسميات

حتى لا تقع ضحية للنصابين .. تعرف على أنواع تأشيرات العمل للكويت

دائما ما يتعرض "المصريون" خاصة لعمليات يمكن أن نسميها "نصب" أثناء بحثهم لفرصة عمل إلى الكويت ، فرغبة منهم في السفر بأي طريقة فيقعون فريسة سهلة لتجار "التأشيرات" ولكن بمجرد وصوله لأرض الكويت ، يظل يندب حظه طوال العام وربما يخسر كل ما أنفقه .

النصب لا يعني هنا أن التأشيرات غير حقيقية ، لا ، فالمقصود تقديم معلومات خادعة مثل إقناعه أنه يستطيع التحويل من مهنة مزارع مثلا إلى مندوب بعد عام !


لذلك صديقي المقبل على السفر للكويت عليك بقراءة هذه الموضع الذي كُتب بالعامية حتى يصل لأبسط الناس بطريقة واضحة :

بتفكر تسافر الكويت او جايلك عقد هناك يبقي ابعد عن أنواع العقود التالية

1- العقود الحكومية :

ودي قصتها ان الدولة بتطرح مناقصة وشركة ما بتفوز بيها ، فالشئون بتدي الشركة عدد معين من العمالة تقدر تستقدمها من الخارج ،فالعمالة اللي جاية علي المشروع ده بتكون اقامتها علي الشركة لكن نوع العقد عقد حكومي ...
طيب ايه عيوبها ؟
- العقود الحكومية غالبا ثلاث سنوات لما ينتهي مجبر تحول فقط اما علي عقد حكومي تاني علي نفس الشركة وتدفع 200 دينار او تحول علي عقد حكومي تاني لدى كفيل آخر وتدفع 300 دينار (الفلوس دي رسوم تدفع للهيئة العامة للقوى العاملة) ...الرسمي انه مفترض الكفيل (الشركة) هي اللي تدفع الرسوم دي لكن اللي سائد ان المبالغ دي بتتخصم من العامل
- برضه لو حصلت فرصة أفضل في شركة تاني مش هتقدر تحول الا بموافقة الكفيل وكمان لازم الكفيل الجديد يكون عنده عقود حكومية عشان تحول عليها ، لان اللي داخل البلاد علي عقد حكومي تحويله مقتصر من حكومي الي حكومي فقط
- لو عقدك انتهى والشركة مكنش عندها عقود تانية مجبر تحول علي شركة تاني عندها حكومي لو معرفتش تحصل شركة مجبر تغادر البلاد
- غالبا لو عقدك انتهي صعب تلاقي تحويل لان اغلب الشركات بتفضل تستقدم عمالة من الخارج عشان هتجيبها ب رواتب اقل علي عكس اللي محول من داخل البلاد
- لو كفيلك اتاخر عليك في الرواتب والمستحقات وفكرت تشتكي فصعب تحول من عليه ومستحقات هتاخذ وقت كبير وتتحول محكمة وفي الاخر هتتفنش وتروح
طيب ازاي تعرف هل سمة الدخول المرسلة ليك تخص عقد حكومي ولا لاء ...هتلاقي ختم إدارة عمل العقود والمشاريع الحكومية علي سمة الدخول ولما تدخل البلاد وتعمل اذن العمل هتلاقي مكتوب من فوق إدارة العقود والمشاريع الحكومية و من اسفل اسم العقد الحكومي التابع ليه

طيب ايه الحالات اللي ممكن اوافق فيها علي عقد حكومي ؟

- ان الشركة كبيرة ومعاها عقود كتير والمقابل المادي مجزي بحيث لو كنسلت في نهاية العقد مش هتفرق كتير لكن مقابل مادي ضعيف علي امل انك تحصل وظيفة افضل براتب أعلى بعد انتهاء العقد لدي شركة اخري انسي
- تكون الجهة الحكومية اللي شغال فيها محتاجك وبالتالي لما عندك ينتهي بتجبر او تتفق مع الشركة الجديدة اللي رسيت عليها المشروع تجيب نفس الناس القديمة خصوصا في مناقصات الاستشارين والمراقبين الماليين
- ان الراتب يكون معقول ومش دافع اي فلوس للسفر لكن مقابل ضعيف وعقد حكومي وادفع فلوس لا بلاش منه
- طبعا لو داخل البلاد بعقد اهلي وحولت علي عقد حكومي تقدر ترجع اهلي تاني بدون مشاكل بشرط مرور عام (ممكن تحول قبل العام بعد مرور 6 اشهر بس هتدفع رسوم تقريبا 200 دينار) وتجيب ورقة اسمها تسلسل إقامات ترفقها مع ورق التحويل

2- المزارع 

اي عامل مستقدم علي للعمل في مرزعة التحويل مقتصر علي مزارع فقط

3- المشروعات الصغيرة والمتوسطة:

التحويل فيها مقتصر من مشروعات متوسطة الي متوسطة وبشرط نفس النشاط وبعد مرور ثلاث سنوات من دخولك البلاد ، لو جاتلك سمة الدخول صادرة من ادارة عمل مبارك الكبير او ادارة عمل جنوب السرة يبقي تبع النشاط ده

4- المصانع:

الإقامة بتكون علي مصنع والتحويل مقتصر لمصانع فقط وبعد مرور ثلاث سنوات من دخوله البلاد فقط

5- الرعي والصيد :

اي عامل مستقدم علي الأنشطة دي ملوش تحويل الا علي نفس النشاط وبعد مرور ثلاث سنوات من دخولك البلاد

6- المنطقة التجارية الحرة 

الكويت فيها منطقة حرة واحدة ومفهاش تحويل اساسا ،مش عجبك الكفيل كنسل إقامتك

7- الجميعات التعاونية

الجمعية التعاونية زي السوبر ماركت الكبير وبيكون في كل منطقة جميعة ولها فروع في كل قطعة،وحاليا التحويل من الجميعات (لمن دخل البلاد اول مرة علي جمعية) مقتصر علي نفس النشاط فقط ولا يستطيع التحويل الي القطاع الاهلي
*- طيب ايه افضل قطاع ممكن اجي عليه ؟ هو القطاع الاهلي والشركات الخاصة
في القطاع الاهلي تقدر تحول بعد مرور عام من دخولك البلاد بموافقة الكفيل او مرور 3 سنوات بدون موافقة الكفيل (لو الكفيل موافق تقدر تحول بعد مرور 6 شهور بس تدفع 300 دينار رسوم) وبالنسبة لتاني كفيل والباقي تقدر تحول في اي وقت بشرط موافقة الكفيل او لو مش موافق تقدر شكوي في الهيئة العامة للقوي العاملة وتحول (ليها شروط)

**لو انت اذن عملك علي النشاطات السابقة وجالك تحويل علي وزارة (مادة 17) تقدر تحول عادي لان الوزارة مستثناة
** لو دخلت البلاد علي عقد اهلي ثم قمت بالتحويل علي احد الانشطة السابقة تقدر تحول عادي تاني اهلي او اي نشاط بشرط ارفاق تسلسل اقامات مع اوراق التحويل
** حوار التحويل فيها فيها حورات كتير وقوانين حاولت اجتهد قدر الامكان فيها

* هذا الموضوع منقول من موقع التواصل الاجتماعي "فيس بوك"دون الإشارة لمصدره ، على صاحبه مراسلتنا في حالة رغبته في إضافة إسمه كمصدر*

في حال وجود معلومات مغلوطة يرجى التواصل معنا لتصحيحها 

ليست هناك تعليقات:

إرسال تعليق

جميع الحقوق محفوظة 2014-2015 تصميم اكرم تكويد احمد